யாழ்ப்பாணம் ராஜா தியேட்டர்

யாழ்ப்பாணம் ராஜா தியேட்டர் நிறுவனர் சக உரிமையாளர் STR என்ற தியாகராஜா அவர்கள் மறைந்த செய்தி வந்திருக்கிறது.

90 களில் ஒருநாள் ராஜாதி ராஜா படத்தை என் நண்பர்களுடன் இங்கு பார்த்து விட்டு வெளியே வரும் போது கோட்டை இராணுவ முகாம் மீது புலிகளின் முற்றுகை தொடங்கி விட்டது.

ராஜா என்று படத் தலைப்பு வந்தால் இங்கு தான் ஓட வேண்டும் என்று பகீரதப் பிரயத்தனம் செய்வார்கள் என்று கேள்விப்பட்டிருக்கிறேன். 

தியேட்டர் முதலாளி S.T.R தீவிர எம்.ஜி.ஆர் ரசிகர்.

அதனால் எம்.ஜி.ஆர் நூற்றாண்டுக்கும் மறக்காமல் கொண்டாடிக் கொண்டிருக்கிறார்கள்.

ராஜா தியேட்டரை உருவாக்கிய போது சக தியேட்டர் முதலாளிகளின் புறக்கணிப்பு, தொழிற் போட்டி, அதனால் படங்களை இறக்குமதி செய்ய முடியாத இக்கட்டான சூழலில் தமிழரசுக் கட்சியின் கை கொடுப்பு,

எம்ஜிஆரின் “காவல்காரன்” படத்தைத் திரையிடும் சூழலில் அவர் குண்டடிபட்டுப் படுக்கையில் இருந்த சூழலில் கொடுத்த வாக்குறுதியைக் காப்பாற்றி யாழ்ப்பாணம் வந்த கதையை எல்லாம் IBC தொலைக்காட்சிக்கு வழங்கிய பேட்டியில் குறிப்பிட்டிருக்கிறார்.

https://youtu.be/9cDQhjBYUDk

நாட்டின் பிற தமிழ்ப் பகுதிகளில் தமிழ் சினிமா அரங்குகள் சிலவற்றையும் தம் நிர்வாகத்தின் கீழ் வைத்திருக்கிறார்கள்.

ஒரு காலத்தில் ராஜா தியேட்டரில் எம்.ஜி.ஆர் படமும் அதற்கு நேர் முன்னே இருந்த வின்சர் தியேட்டரில் சிவாஜி கணேசன் படமுமாகப் போட்டி போடுமாம். ரசிகர்களுக்குள் கத்திக் குத்துச் சண்டை வரை போய், அந்த நேரம் தான் ஒரு மல்யுத்த வீரனைப் போலக் களத்தில் இறங்கி அவர்களை விரட்டிய கதையை வின்சர் தியேட்டரில் முகாமையாளராக இருந்த மூத்த குடிமகன் ஒருவர் எனது வானொலி நிகழ்ச்சியில் பகிர்ந்திருக்கிறார்.

இன்று யாழ்ப்பாணத்தின் நகரப் பகுதியில் தனி தியேட்டர் என்ற வகையில் ராஜா தவிர செல்லா ( முன்பு சாந்தி) தியேட்டர் இருந்தாலும் ராஜாவின் பழைய செல்வாக்கை இன்னும் தக்க வைத்துக் கொண்டே இருக்கிறது. 

STR இற்கு ஆழ்ந்த இரங்கல்கள்.

ராஜா தியேட்டர் படங்கள் 2019 இல் என் தாயக உலாத்தலில் எடுக்கப்பட்டவை.

போர் தின்ற எழுத்தாளர் நெல்லை க.பேரன் 75 நினைவுகளில்

ஈழத்தில் ஒரு எழுத்தாளர் குடும்பமே ஒன்றாகப் படுகொலை செய்யப்பட்டது என்ற அழியா வடு கொண்டது எழுத்தாளர் நெல்லை க.பேரனின் வாழ்க்கையில் தான்.

அது நடந்தது ஜூலை 15, 1991 இல். 

எழுத்தாளரும், பத்திரிகையாளருமான நெல்லை க.பேரன், அவரின் மனைவி உமாதேவி,  மகன் உமா சங்கர், மகள் சர்மிளா என்று அந்த ஒட்டுமொத்தக் குடும்பமே அந்த ஜூலை 15 இரவில் இலங்கை இராணுவத்தின் எறிகணைத் தாக்குதலில் கொல்லப்பட்டுப் படுகொலையானதைப் படித்தது இன்றும் நினைவில் தங்கி ஈரக்குலையை வருத்தும்.

காரணம், அதற்கு ஒரு சில ஆண்டுகளுக்கு முன்னர் தான் என்னுடைய லைப்ரறி சேர் 

"இந்தாரும் பிரபா! எந்த நேரமும் செங்கை ஆழியனைத் தேடாதையும்

இவரையும் படியும் என்று எடுத்துத் தந்த புதுப் புத்தகம் தான்

நெல்லை பேரனின் 'சத்தியங்கள்' என்ற சிறுகதைத் தொகுதி. எமது கொக்குவில் இந்து நூலகத்துக்குப் புதிதாக வந்திருக்கிறது என்பதை அந்த வாசனையே காட்டிக் கொடுத்தது.

எனக்கு அந்தப் புது எழுத்தும் பிடித்துப் போய் ஒரே மூச்சில் வாசித்து விட்டு லைப்ரறி சேருக்கும் நன்றி சொன்னேன் அப்போது.

இன்றைய நாள் டிசெம்பர் 18, நெல்லை க.பேரன் இருந்திருந்தால் அவருக்கு 75 வது பிறந்த தினத்தைக் கொண்டாடியிருப்பார் தன் குடும்பம் சூழ.

நெல்லை க.பேரனின் 'சத்தியங்கள்" சிறுகதைத் தொகுதியைப் படிக்க

https://noolaham.net/project/16/1541/1541.pdf

நன்றி :

நூலகம் - ஈழநாடு, முரசொலி மற்றும் சிறுகதை ஆவணப்பகிர்வு

"வாகீச கலாநிதி" பேராசிரியர் கனகசபாபதி நாகேஸ்வரன் அவர்கள் மறைந்தார்

ஈழத்தின் தலைசிறந்த தமிழ்ப் புலமையும், ஆன்மிக வளமும் கொண்ட வாகீசகலாநிதி பேராசிரியர் கனகசபாபதி நாகேஸ்வரன் அவர்கள் மறைந்த செய்தி அறிந்து அதிர்ச்சியும் கவலையும் கொள்கின்றேன்.

தொண்ணூறுகளில் கோயில் திருவிழா மேடைகளில் இவரின் ஆன்மிக உரைகளைக் கேட்டு வளர்ந்த பரம்பரை நாம்.

களையான சிரித்த முகமும், பண்பாகப் பேசும் ஆற்றலும் கொண்ட பெருந்தகை இழப்பில் அன்னார் இறைவன் திருவடியில் சங்கமிக்கப் பிரார்த்திக்கின்றேன்.

பேராசிரியர் கனகசபாபதி நாகேஸ்வரன் குறித்த பகிர்வும், ஆக்கியவை சிலதும்

பன்முக ஆளுமை மிக்க பேராசான்

http://archives.thinakaran.lk/Vaaramanjari/2012/11/04/...

நூலகம் தளத்தில்

வாகீசகலாநிதி, முனைவர் கனகசபாபதி நாகேஸ்வரன் அவர்களின் மணிவிழா மலர் 2013

https://noolaham.net/project/712/71105/71105.pdf

தமிழியல் ஆய்வுச் சோலை

https://noolaham.net/project/663/66285/66285.pdf

தமிழின் ஆளுமைகள்

https://noolaham.net/project/659/65856/65856.pdf

வலைப்பதிவு உலகில் நிறைந்த என் 16 ஆண்டுகள்

இதே நாள் டிசெம்பர் 5 ஆம் திகதி 2005 ஆம் ஆண்டில் எனக்கென ஒரு வலைப்பதிவை "மடத்துவாசல் பிள்ளையாரடி" என்ற பெயரில் ஆரம்பித்து இன்றோடு 16 ஆண்டுகளை நிறைவு செய்து 17 வது ஆண்டில் காலடி வைக்கிறேன்.

இதுவரை 

415 பதிவுகள் 

மடத்துவாசல் பிள்ளையாரடி தளத்திலும்

http://kanapraba.blogspot.com/

ஈழத்து நினைவுகளுக்கும், எம்மவர் குறித்த சிலாகிப்புக்களுமாக

740 பதிவுகள் 

றேடியோஸ்பதி தளத்திலும்

http://www.radiospathy.com/

என்னை உயிர்ப்பித்து வைத்திருக்கும் நல்மருந்தாய் அமையும் பாடல்கள்,பின்னணி இசைப் பகிர்வுகளுக்காக

140 பதிவுகள்

உலாத்தல் தளத்திலும்

http://ulaathal.com

எனக்கு உலாத்தப் பிடிக்கும், அதைவிட உலாத்தியதைப் பேசப் பிடிக்கும் அதற்காகவும் என்று வகைப்படுத்தி எழுதி வருகிறேன்.

106 பதிவுகள்

வீடியோஸ்பதி தளத்திலும்

https://www.youtube.com/c/videospathy

காணொளி ஊடகத்துக்காக வீடியோஸ்பதி வலைத் தளம், இரண்டு வருட காலத்துக்குள் கணிசமான இடுகைகளை அதில் இட்டிருக்கிறேன். 

தொடர்ந்து இன்னும் இதில் தீவிரமாக இறங்கவுள்ளேன்.

தவிர ஈழத்து முற்றம், இசையரசி, கங்காரு தேசம் போன்ற குழுமத் தளங்களிலும் பங்களித்திருக்கிறேன். அவை தனிக்கணக்கு.

இன்றைய சூழலில் வலைப்பதிவுப் பகிர்விலிருந்து இடம் மாறி ஃபேஸ்புக், ட்விட்லாங்கர், கூகுள் ப்ளஸ் போன்ற தொழில் நுட்ப வாகனங்களுக்குப் பல மூத்த பதிவர் நிரந்தரமாக இடம் மாறிய சூழலில், தொடர்ந்தும் வலைப்பதிவில் இயங்கும் மிகச் சிலரில் நானும் ஒருவன் என்ற வகையில் பெருமை கொள்கிறேன். வாழ்க்கையில் எதிர்கொண்ட பல்வேறு சவால்களுக்கு ஒத்தடமாக என் வலையுலக வாழ்க்கையே துணை நின்றிருக்கிறது.

இந்தப் 16 ஆண்டுகளிலும் கை கொள்ளுமளவுக்காவது தொடர்ச்சியான வாசகர் வட்டத்தோடு என்னை இணைத்து வைத்துக் கொள்வது,

என் ஆத்ம திருப்திக்காகப் பகிரும் எழுத்து இதுவரை இரண்டு ஆராய்ச்சி மாணவியர் தம் பட்ட மேற்படிப்புக்காக என்னுடைய ஈழத்து வாழ்வியல், கலை இலக்கியப் பதிவுகளை வைத்துச் செய்து கொண்டது இவையெல்லாம் இந்த நீண்ட பயணத்தின் அறுவடைகளாகப் பெருமை கொள்ள வைக்கின்றது.

அவ்வப்போது வரும் தனி மடல்களில் நான் எப்போதோ எழுதிய பதிவை மேற்கொள் காட்டி வரும் அறிமுகங்களும் இந்த எழுத்துச் சேமிப்புகள் எங்கோ, எப்போதோ, எவருக்கோ பயன்படும் என்ற என் ஆரம்ப காலச் சிந்தனைகளை வேரூன்றி வைத்திருக்கின்றன.

பால்ய காலத்து ஈழத்து வாழ்வியலில் இருந்து எழுத்தாளர்கள் தாம் ஆதர்ச நாயகர்களாக அடையாளப்பட்டார்கள். தேடித் தேடி வாசிப்பதோடு நின்று விடாது எழுதி அதைப் பதிப்பிக்கவும் வேண்டுமென்ற வேட்கையில் அப்போது நானும் பள்ளிப் பிராயத்தில் இருந்தே எழுதி அனுப்பிக் கொண்டிருந்தேன்.

ஈழநாடு, முரசொலி போன்ற பத்திரிகைகளோசு உதயன் பத்திரிகை அப்போது கொண்டு வந்திருந்த அருச்சுனா என்ற சிறுவர் சஞ்சிகையில் கதைப் போட்டியில் சிறப்புப் பரிசு வாங்கியிருக்கிறேன். 

அவ்வப்போது அவுஸ்திரேலியாவில் வெளிவந்த ஈழமுரசு, உதயம் பத்திரிகைகளுக்கு எழுதி வந்தேன்.

இந்தச் சூழலில் வலைப்பதிவு (Blog) யுகம் என்னுள் தேங்கியிருந்த எழுதும் ஆர்வத்தை மடை திறப்புச் செய்தது. வலைப்பதிவு உலகின் சிறப்பு என்னவெனில் அது எழுதுபவரையும், வாசிப்பவரையும் மிக அணுக்கமாக வைத்துக் கொள்வது. நான் ஒன்றை எழுதப் போக அதை இன்னொரு கோணத்தில் பார்க்கும் வாசகனையும், இன்னும் தேடலும் பதித்தலும் நிறைந்த வாசகர்களையும் எனக்கு அறிமுகப்படுத்தியது. இதனால் வலைப்பதிவு உலகம் வெறுமனே எழுத மட்டும் களத்தை வழங்காமல் கற்றுத் தேறிக் கொண்டே இருக்கவும் வழி ஏற்படுத்தியது.

ஒவ்வொரு நாளும் ஏதோ ஒன்றைப் பற்றி எழுதுகிறேன். அது நான் வாழ்ந்த தேசத்து நினைவுகளாகவோ, என்னை உயிர்ப்பித்து வைத்திருக்கும் இசையாகவோ அன்றில் அந்தந்த நேரத்து மன உணர்வின் வெளிப்பாடாகவோ அமைகின்றது. எழுதுவதால் அந்த இறந்த காலத்தை உயிர்ப்பிக்கிறேன், அந்தக் கால கட்டத்துக்குள் சென்று வாழ்கிறேன். மனிதர்களை, வாழ்ந்த காலத்தை மீள வாசிக்கிறேன். எப்பேர்ப்பட்ட வரம் இது.

இறந்த காலத்து மனிதர்களை; அந்தக் காலத்துச் சம்பவங்களை உயிர்ப்பித்து எழுதி வந்த பதிவுகளைப் படித்துத் தங்கள் காலத்தவரோடு ஒப்பிட்டுப் பார்த்து அழுதும் உணர்வு வயப்பட்டும் எழுதிய தனி மடல்களும், பின்னூட்டல்களும் தான் என் எழுத்துக்கான இலக்கைத் தீர்மானித்திருக்கின்றன.

ஈழத்துப் படைப்பாளிகள், கலையுலகச் செயற்பாடுகள், பயண அனுபவங்கள், செவி நுகர் கனிகளாம் இசையின்பம் இவற்றைச் சுற்றியே என் வலையுலகப் பயணம் தொடர்கிறது.

இதுவரை 

"கம்போடியா - இந்தியத் தொன்மங்களை நோக்கி", 

"பாலித் தீவு - இந்துத் தொன்மங்கள்  நோக்கி”

“அது எங்கட காலம்”  - ஈழத்து வாழ்வியல் நனவிடை தோய்தல்”

ஆகிய நூல்களை வெளியிட்டிருக்கிறேன். 

இதோ இந்த டிசெம்பர் 2021 இல் வருகிறது 

SPB பாடகன் சங்கதி 

என்ற எனது நான்காவது படைப்பு.

தொடர்ந்து என் இரசனையும், தேடலும் வற்றாத கிணறாக ஊறிக் கொண்டிருக்க, வாசகராகிய உங்கள் ஆதரவோடு பயணத்தைத் தொடர்கிறேன்.

நேசம் கலந்த நட்புடன்

கானா பிரபா

05.12.2021